دوای ئه‌وه‌ی پرۆژه‌ی داكۆكیكردن و یاسا ژینگه‌ییه‌كان سه‌ردانی بیرێكی ئاویان كرد له‌ گوندی گورگه‌یی فه‌تاح نزیك قه‌زای چه‌مچه‌ماڵی سه‌ر به‌ پارێزگای سلێمانی له‌ به‌رواری 24-5-2017، به‌هۆی بونی ماده‌ی كبریت و دروستبوونی گازی میثان له‌ ناو ئه‌و بیره و ده‌رچوونی به‌ شێوه‌ی ئاگر هاوكات له‌گه‌ڵ ئاوی بیره‌كه‌‌، ئه‌م دیارده‌ نامۆیه‌ سه‌رنجی میدیاكانی به‌ لای خۆیدا ڕاكێشاوه‌ و ڕۆژانه‌ هاوڵاتیان سه‌ردانی ئه‌م شوێنه‌ ده‌كه‌ن بۆ له‌ نزیكه‌وه‌ بینینی ئه‌م دیارده‌یه‌. پرۆژه‌ی داكۆكیكردن به‌ پشتگیری دارایی یه‌كیه‌تی ئه‌وروپا له‌ به‌رواری 5-7-2017 هه‌ستان به‌ ئه‌نجامدانی پرۆژه‌یه‌كی هۆشیاری ژینگه‌یی به‌ مه‌به‌ستی پاراستنی ته‌ندروستی و گیانی ئه‌و هاوڵاتیانه‌ی سه‌ردانی ئه‌و بیره‌‌ ده‌كه‌ن له‌ ڕێگه‌ی دروست كردنی ته‌لبه‌نگێك به‌ ده‌وری ئاگری بیره‌كه‌ وه‌ هه‌روه‌ها دروست كردن و دانانی دوو تابلۆی هۆشیاركردنه‌وه‌ كه‌ كۆمه‌ڵێك ڕێنمایی له‌ خۆ ده‌گرێت به‌ هه‌رسێ زمانی كوردی و عه‌ره‌بی و ئینگلیزی نوسراونه‌ته‌وه‌  بۆ پێدان و گه‌یاندنی هه‌ندێك ڕێنمایی سه‌ره‌تایی به‌ سه‌ردانكه‌رانی ئه‌و بیره‌ چ خه‌ڵكانی ناوخۆیی بن یان بیـانی

ڕێكخراوی سروشتی عێراق له‌ پرۆژه‌ی داكۆكیكردن و یاسا ژینگه‌ییه‌كان به‌شداری كۆبونه‌وه‌یه‌كی هاوبه‌شی كرد له‌ هۆڵی ڕێكخراوی كیدۆ له‌ شاری سلێمانی به‌ ئاماده‌بوونی چه‌ند مامۆستایه‌كی زانكۆ و چه‌ند ڕێكخراوێكی كۆمه‌ڵگه‌ی مه‌ده‌نـی له‌ به‌رواری 28-5-2017 كه‌ مه‌به‌ست له‌ كۆبونه‌وه‌كه‌ باس كردن و تاوتوێ كردن بوو له‌سه‌ر ڕاسپارده‌كانی سیمپۆزیمی تایبه‌ت به‌ هه‌فته‌ی ئـاو بۆ سـاڵی ٠2017
ئامانجی كۆبونه‌وه‌كه‌ تاوتوێ كردنی ڕاسپارده‌كان بوو كه‌ خۆی له‌ 19 خـاڵدا ده‌بینێته‌وه‌، كه‌ خستنه‌ ڕووی به‌ربه‌سته‌ ژینگه‌ییه‌كان به‌شێكی گرنگی ڕاسپارده‌كان بوو٠
له‌ كۆتایی كۆبونه‌وه‌كه‌ پلان دانـرا بۆ ئه‌نجـامدانی كۆبوونه‌وه‌یه‌كی هـاوبه‌شی گه‌وره‌ له‌سه‌ر ئاستی كوردستان و بانگێشـت كردنی سه‌رجه‌م لایه‌نه‌ په‌یوه‌ندیداره‌كـان بۆ مه‌به‌ستـی كـاركردنی جدی له‌سه‌ر ڕاسپـارده‌كـان٠
  

پرۆژه‌ی داكۆكیكردن به‌ هاوبه‌شی له‌گه‌ڵ (ئه‌لیساندرۆ تینتی) خوێندكاری دكتۆرا له‌ بواری سیاسه‌ و په‌یوه‌ندیه‌ نێوده‌وڵه‌تیه‌كان له‌ په‌یمانگای (سانت ئانا)ی وڵاتی ئیتاڵیا، سه‌ردانێكی مه‌یدانییان ساز كرد بۆ دوو ناوچه‌ی گرنگی سه‌ر به‌ پارێزگای سلێمانی له‌ به‌رواری٢٤-٥-٢٠١٧. ناوچه‌ی یه‌كه‌م بریتی بوو له‌ تانجه‌رۆ، ئه‌و شوێنه‌ی كه‌ گه‌وره‌ترین كێشه‌ی ژینگه‌یی بۆ شاری سلێمانی و ده‌وروبه‌ری دروست كردووه‌ به‌هۆی ڕژاندنه‌ ناوی ئاوه‌ڕۆی شاری سلێمانی به‌ ڕووباری تانجه‌رۆ وه‌ هه‌روه‌ها فڕێدانی خۆڵ و خاشاكی شاری سلێمانی له‌ ناوچه‌ی تانجه‌رۆ كه‌ به‌ شێوه‌یه‌كی نه‌رێنی كاریگه‌ری له‌سه‌ر ئاوی ڕوباری تانـجـه‌رۆ هه‌یـه‌، لـه‌ كــاتــێــكـدا زۆربـه‌ی ئــه‌و ده‌شـتـانــه‌ی نزیكی ڕووباری تانجه‌رۆن هه‌تاوه‌كو ده‌گه‌نه‌ ده‌ریاچه‌ی ده‌ربه‌ندیخان ده‌شتی كشتوكاڵین و بۆ وه‌رگرتنی ئاو سود لـه‌ له‌ ڕووباری تانجه‌رۆ وه‌ر ده‌گرن٠
ئه‌وه‌ی جێی سه‌رنجه‌ ڕۆژانه‌ شاره‌وانی سلێمانی ته‌نها له‌ ناو سنوری پارێزگای سلێمانی لایه‌نی كه‌م ١٢٠٠ ته‌ن له‌ خۆڵ و خاشاك كۆ ده‌كه‌نه‌وه‌ و له‌ ناوچه‌ی تانجه‌رۆ فڕێ ده‌درێن به‌ بێ بوونی هیچ پرۆژه‌یه‌كی ڕیسایكلین له‌ ناوچه‌كه‌، له‌ هه‌مان كات دا حكومه‌تی هه‌رێمی كوردستانیش بێ ده‌نگه‌ له‌م كێشه‌ گه‌وره‌یه‌ و هیچ ڕێچاره‌یه‌كی ئه‌وتۆ نه‌گیراوه‌ته‌ به‌ر هه‌تا وه‌كو ئێستا، بۆیه‌ پێویسته‌ ڕێكخراوه‌كان فشاری جدی بخه‌نه‌ سه‌ر حكومه‌ت هه‌تاوه‌كو ڕێگه‌ چاره‌یه‌كی زانستی بگرنه‌ به‌ر لـه‌به‌رده‌م ئه‌م كێشـه‌ گه‌وره‌ و پڕ مه‌ترسییه‌دا٠
سه‌ردانی دووهه‌م بۆ گوندی گورگه‌ بوو كه‌ نزیك قه‌زای چه‌مچه‌ماڵ‌ به‌ دووری ٥٥ كم له‌ شاری سلێمانی، به‌هۆی بوونی بیرێكی ئاو كه‌ قوڵیـیه‌كه‌ی نزیكه‌ی ٩٠م ه‌، كه‌ به‌هۆی بوونی كانزای كبریت و گازی میـثـان له‌ ناو ئاوی بیره‌كه‌ به‌ شێوه‌یه‌كی سروشتی ئاو و ئاگر تێكه‌ڵی یه‌كتر ئه‌بن به‌ بێ ئه‌وه‌ی ئاوه‌كه‌ ئاگره‌كه‌ بكوژێنێته‌وه‌، هه‌روه‌ها بۆنی هێلكه‌ی خراپــبوو هه‌ست پێ ئه‌كرا له‌ نزیكی بیره‌كه‌ كه‌ نیشانه‌یه‌كه‌ بۆ بوونی كانزای كبریت له‌و ناوچه‌یه‌٠
پرۆژه‌ی داكۆكیكردن هه‌وڵده‌دات ڕا و پێشنیاری خۆیان بگه‌یه‌نێت به‌ لایه‌نی په‌یوه‌ندیدار سه‌باره‌ت به‌ هه‌ردوو ناوچه‌كه‌ و دۆزینه‌وه‌ی ڕێگه‌ چاره‌ی گونجاو بۆ كه‌م كردنه‌وه‌ی كاریگه‌ری و زیـانـه‌كـانیـان بـه‌رامبـه‌ر بـه‌‌ سروشـت٠

 پرۆژه‌ی داكۆكیكردن و یاسا ژینگه‌ییه‌كان له‌ سروشتی عێراق، هه‌ستان به‌ سازدانی كارخانه‌ (ۆرك شۆپ)ێكی تایبه‌ت له‌ به‌رواری 2017-5-11 له‌ هۆڵی ئوتێل ئه‌بوسه‌نا له‌ شاری سلێمانی بۆ چه‌ند به‌ڕێوه‌به‌ر و مامۆستایه‌كی قۆناغی سه‌ره‌تایی ناو شار و ده‌ره‌وه‌ی شاری سلێمانی له‌ ژێر ناوی ژینگه‌ له‌ ناو پرۆسه‌ی په‌روه‌رده‌دا٠
دوای ئه‌وه‌ی له‌ ماوه‌ی ڕابردوودا پرۆژه‌ی داكۆكیكردن پرۆژه‌یه‌كی په‌روه‌رده‌یی ده‌ست پێكـرد كه‌ سه‌ره‌تاكه‌ی به‌ چاپ كردن و بڵاوكردنه‌وه‌ی ده‌فته‌رێكی وێنه‌ بوو له‌ ژێر ناوی هــاوڕێـی ژیـنـگه‌ به‌سه‌ر چه‌ند خوێندنگه‌یه‌كی سه‌ره‌تایی ناوشار و ده‌ره‌وه‌ی سلێمانی، وه‌ قۆناغـی دووه‌می پرۆژه‌ په‌روه‌رده‌ییه‌كه‌ به‌
كارخانه‌ی ناوبراو كۆتایی هات كه‌ مه‌به‌ستی سه‌ره‌كی لێی هه‌ڵسه‌نگاندن و وه‌رگرتنه‌وه‌ی ئه‌و ده‌ستكه‌وتانه‌ بوو كه‌ له‌ قۆناغی یه‌كه‌م كارمان بۆی كردبوو​٠
 
كورته‌یه‌ك له‌سه‌ر كارخانه‌كه‌ی تایبه‌ت به‌ ژینگه‌ له‌ناو پرۆسه‌ی په‌روه‌رده‌دا
دوای وته‌ی به‌خێرهاتن، (ڕاژان ئاسـۆ) له‌ پرۆژه‌ی داكۆكیكردن له‌ سروشتی عێراق باسی له‌ كار و چالاكییه‌كانی پرۆژه‌ی داكۆكیكردن كرد له‌ ماوه‌ی ڕابردوودا وه‌ باسی له‌و ده‌ست كه‌وتانه‌كرد كه‌ پرۆژه‌كه‌ به‌ ده‌ستی هێناوه‌ هه‌تاوه‌كو ئێستا٠
دواتر له‌ لایه‌ن (دیاری محمد رشید) له‌ پرۆژه‌ی داكۆكیكردن له‌ سروشتی عێراق، باسی له‌ ژینگه‌ كرد به‌ شێوه‌یه‌كی گشتی وه‌ جۆر و هۆكاره‌كانی پیس بوونی روون كرده‌وه‌ به‌ نموونه‌وه‌  وه‌ چه‌ند ئامارێكی جیهانی خسته‌ ڕوو له‌سه‌ر كاریگه‌ری جۆره‌ جیاوازه‌كانی پیسكه‌ره‌كان له‌سه‌ر ژینگه‌ وه‌ هه‌روه‌ها باسی له‌ نه‌بوونی ئاماری ورد و زانستی كرد له‌سه‌ر پیسكه‌ره‌كانی ژینگه‌ له‌ هه‌رێمی كوردستان و عێراق، هه‌ربۆیه‌ ناچار ده‌بین پشـت به‌ ئاماره‌ جیهانیـیه‌ باوه‌ڕ پێكراوه‌كانن ببه‌ستـیـن له‌ كاتی نه‌بوونی ئاماری ناوخۆیی٠
دواتر له‌ لایه‌ن به‌ڕێز (ئاكۆ عبدالمجید سعید) به‌ڕێوه‌به‌ری پرۆگرامه‌كان له‌ به‌ڕێوه‌به‌رایه‌تی گشتی په‌روه‌رده‌ی سلێمانی، بابه‌تێكی پێشكه‌ش كرد له‌ ژێر ناوی ستراتیژه‌كانی گۆڕانكاری له‌ مرۆڤـدا، كه‌ خاڵ به‌ خاڵ باسی له‌ ستراتیژه‌كانی گۆڕانكاری كرد وه‌ هێنانه‌وه‌ی چه‌ندین نموونه‌ی جۆراروجۆر له‌سه‌ر بابه‌نه‌كه‌٠
پاشان له‌ لایه‌ن به‌ڕێز (شیروان فاتح) بابه‌تێكی پێشكه‌ش كرد به‌ ناوی كاریگه‌ری هونه‌ر له‌سه‌ر ژینگه‌، وه‌ هه‌روه‌ها باسی له‌ په‌رتوكی (هاوڕێی ژینگه‌) كرد كه‌ به‌ڕێزیان سه‌رپه‌رشتی هونه‌ریی ئه‌و په‌رتوكه‌یان كردبوو وه‌ باسی له‌وه‌كرد چۆن توانیویانه‌ هونه‌ر په‌یوه‌ست به‌كه‌ن به‌ ناوه‌ڕۆكی بابه‌ته‌كانی په‌رتوكه‌كه‌وه‌٠
له‌ به‌شی كۆتای كارخانه‌كه‌، گفتوگۆیه‌كی كراوه‌ كرا له‌سه‌ر په‌رتوكی (هاوڕێی ژینگه‌) وه‌ سه‌رجه‌م ئاماده‌بووان رای خۆیان دا له‌سه‌ر په‌رتوكه‌كه‌ دا و باسی كاریگه‌ری ئه‌و په‌رتوكه‌یان كرد له‌سه‌ر خوێندكاره‌كانیان كه‌ پێشتر له‌ لایه‌ن سروشتی عێراقه‌وه‌ ئه‌و په‌رتوكه‌ به‌سه‌ر خوێندنگه‌كانیاندا دابه‌شكرابوو، وه‌ به‌ كۆی ده‌نگ ئاماده‌بووان به‌ گرنگیان زانـی وه‌ هیوایان بۆ خواست كه‌ وه‌زاره‌تی په‌روه‌رده‌ی حكومه‌تی هه‌رێم په‌رتوكی (هاوڕێی ژینگه‌) داخڵی پرۆسه‌ی خوێندن بكات بۆ ساڵی داهاتوو له‌ به‌ر ئه‌وه‌ی به‌ وته‌ی خۆیان گاریگه‌ری یه‌كی ڕاسته‌وخۆ و ئیجابی هه‌بووه‌ له‌سه‌ر خوێندكاره‌كانیان وه‌ سوپاسی پرۆژه‌ی داكۆكیكردنیان كرد كه‌ له‌ خه‌می دروست كردنی نه‌وه‌یه‌كی ژینگه‌ زان و ژینگه‌ دۆست دان٠
پرۆژه‌ی داكۆكیكردن به‌رده‌وامی ده‌دات به‌و پرۆژه‌ ژینگه‌یی یه‌وه‌ له‌ نزیكترین كات دا قۆناغی سێهه‌می پرۆژه‌كه‌ی ده‌ست پێ ده‌كات٠
جێی سوپاسه‌ كه‌ به‌ڕێوه‌به‌رایه‌تی گشتی په‌روه‌رده‌ی سلێمانی و به‌ڕێز (ئاكۆ عبدالمجید سعید) به‌ڕێوه‌به‌ری پرۆگرامه‌كان هه‌میشه‌ ڕا و سه‌رنجی خۆیانیان بۆ ده‌ربڕیوین له‌ هه‌ریه‌كێك له‌ قۆناغه‌كانی پرۆژه‌ په‌روه‌رده‌ییه‌كه‌مان وه‌ پشتگیری خۆیان بۆ پرۆژه‌كه‌ دوپات كردووه‌ته‌وه‌ به‌ نوسراوی فه‌رمی به‌ڕێزیان٠
 ​    

 ڕێكخراوی سروشتی عێراق وه‌كو كاری به‌رده‌وامی خۆی له‌ خزمه‌ت كردن به‌ ژینگه‌، ستافی ڕێكخراوه‌كه‌ له‌ شاری سلێمانی هه‌ستان به‌ به‌شداری كردن  له‌ ڤیستیڤاڵی ڕۆژی زه‌وی له‌ پاركی ئازادی له‌ به‌رواری 22ی نیسانی 2017، هه‌موو ساڵێك له‌ جیهاندا ئه‌م ڕۆژه‌ دیاری كراوه‌ بۆ پشتگیری كردن له‌ پاراستنی زه‌وی به‌ شێواز و چالاكی جۆراوجۆر كه‌ پارێزه‌رانی ژینگه‌ و ڕێكخراوه‌كانی كۆمه‌ڵگه‌ی مه‌ده‌نی هه‌ڵده‌ستن به‌ وشیار كردنه‌وه‌ی تاك و كۆمه‌ڵگه‌ له‌و هه‌ڕه‌شانه‌ی ڕووبه‌ڕوی زه‌وی بوونه‌ته‌وه‌
 مێژووی ڕۆژی جیهانی زه‌وی ده‌گه‌ڕێته‌وه‌ بۆ ساڵی 1970 ، بۆ زانیاری زیاتر له‌سه‌ر ڕۆژی زه‌وی كلیك لێره‌ بكه‌

​پرۆژه‌ی داكۆكیكردن و یاسا ژینگه‌ییه‌كـان، پرۆژه‌یه‌كی ٤ سـاڵی ڕێكخراوی سروشتی عێـراقه‌، پـرۆژه‌كه‌ به‌ گرنگی زانی پرۆژه‌یه‌كی په‌روه‌رده‌یی تایبه‌ت به‌ ژینگه‌ به‌ ئه‌نجام بگه‌یه‌نێت بۆ چه‌ند خوێندنگه‌یه‌كی ناو شار و ده‌ره‌وه‌ی سلێمانی بۆ قۆناغی  بنـه‌ڕه‌تـی و ئاسـتـه‌كـانـی ١-٣ كـه‌ بـه‌رواری ١١۔ ٤ ۔٢٠١٧ یـه‌كـه‌م ڕۆژ و ده‌ست پـێكی جێبـه‌جـێكردنـی ئـه‌و پرۆژه‌یه‌ بوو ئـامـانـجی ئـێـمه‌ لـه‌ هـه‌ڵبژاردنـی ئـه‌و قـۆناغه‌ بـۆ ئـه‌وه‌ ده‌گه‌ڕێنینه‌وه‌ كـه‌ پێمان وایـه‌ منداڵ له‌ قۆناغه‌دا زۆر چالاكه‌ و توانای فـێـربوونـی خـێرایـه‌ و ده‌تـوانـێـت ئاسـانـتر گاریگـه‌ری لـه‌سـه‌ر خـێزان و هاوڕێـكانـی دروسـت بـكات٠

كورته‌یه‌ك له‌سه‌ر بیرۆكه‌ی پرۆژه‌كه‌ هه‌تا ئه‌مڕۆ و پلانی داهاتوومان

دوای ئه‌وه‌ی له‌ سه‌ره‌تای مانگی شوبات به‌ گرنگمان زانی پرۆژه‌یه‌ك بۆ خوێندكارانی بنه‌ڕه‌تی به‌ تایبه‌تی قۆناغی ١-٣ به‌ ئه‌نجام بگه‌یه‌نین، ئه‌ویش له‌ ڕێگه‌ی بیرۆكه‌یه‌كی تایبه‌ته‌وه‌ ئه‌ویش به‌ كۆكردنه‌وه‌ی هه‌ندێك وێنه‌ كه‌ گوزارشت بكه‌ن له‌ (ژینگه‌ به‌ گشتی، خێزان، خوێندن، سه‌رچاوه‌ ئاوییه‌كان، ئاژه‌ڵه‌كان، كه‌ش وهه‌وا...) وه‌ له‌ لایه‌ن كۆمه‌ڵێك دیزاینه‌ری به‌ تواناوه‌ وێنه‌كان دووباره‌ كێشرانه‌وه‌ و به‌ شێوازێكی ته‌واو كورده‌واریانـه‌ وێنـه‌ كرانه‌وه‌ بۆ ئه‌وه‌ی خوێنكاره‌كان زۆر به‌ ئاسانتر لێی تێـبگه‌ن و لێوه‌ی فێر بن، وه‌ بۆ هه‌ر په‌ڕه‌یه‌ك ڕێنماییه‌كی تایبه‌ت به ‌وێنه‌ی ئه‌و په‌ڕه‌یه‌مان زیاد كرد كه‌ به‌ زمانێكی ئاسان و په‌روه‌رده‌ییانه‌ نووسراون هه‌تاوه‌كو خوێندكاره‌كان له‌ كاتی ڕه‌نگ كردنه‌وه‌ی وێنه‌كانـدا لێـوه‌ی فێر بن، دوای تـه‌واو بوونی كـار و دیزاینه‌كان بۆ ماوه‌ی زیاتر لـه‌ ٤٥ ڕۆژ، ده‌فتـه‌ره‌ وێنه‌كـه‌ چاپ كرا لـه‌ ژێر ناوی هاوڕێی ژینگه‌​٠

​جگه‌ له‌ ده‌فته‌ره‌ وێنه‌كه‌، پرۆژه‌كه‌مان سێتێك قه‌ڵه‌می ڕه‌نگا و ڕه‌نگیشی وه‌ك ته‌واوكه‌ری ده‌فته‌ره‌ وێنه‌كه‌ كردۆته‌ دیاری بۆ خوێندكاره‌كان، جگه‌ له‌وانه‌ی كه‌ باس كران بۆ هه‌ر خوێندكارێكیش زه‌رفێكی ژینگه‌یی ده‌درێتێ كه‌ به‌ هه‌مان شێوه‌ له‌ لایه‌ن پرۆژه‌ی داكۆكیكرده‌وه‌ ئاماده‌ كراوه‌ كه‌ ڕێژه‌یه‌كی زۆر كه‌م نایلۆنی تێدایه‌ و چه‌ندین جار به‌كار ده‌هێنرێته‌وه‌ و سودی لێ ده‌بینرێت. ئێمه‌ ئه‌م پرۆژه‌یه‌مان كردۆته‌ چه‌ند قۆناغێك، كه‌ به‌رواری ١١۔ ٤ ۔٢٠١٧ ده‌ست پێكی جێبه‌جێ كردنی یــه‌كه‌م قۆتاغی كاره‌كان بوو،كه‌ بریتی یه‌ له‌ بڵاو كردنه‌وه‌ی سێتی ده‌فته‌ره‌ وێنه‌كان به‌سه‌ر چه‌ند خوێندنگه‌یه‌كی بنه‌ڕه‌تی ناو و ده‌ره‌وه‌ی شاری سلێمانی و به‌ درێژایی چه‌ندین ڕۆژ وه‌ به‌ ئاماده‌بوونی نوێنه‌رانی ب.گ. په‌روه‌رده‌ی سلێمانی پاكێجی (هاوڕێی ژینگه‌) گه‌یه‌ندرایه‌ ده‌ست خوێندكاره‌كانی ئه‌و خوێندنگایانه‌ی كه‌ به‌ هاوبه‌شی له‌گه‌ڵ ب.گ. په‌روه‌رده‌ی سلێمانی دیاری كرابوون. قۆناغی دووه‌م و سێ یه‌می پرۆژه‌كه‌ بریتی ده‌بێت له‌ به‌ دواداچوون له‌و چه‌ند خوێندنگایانه‌ی كه‌ خوێندكاره‌كانیان سوودمه‌ند بوون له‌ (هاوڕێی ژینگه‌) هه‌تا وه‌كو بزانین خوێندكاره‌كانیان چی لێوه‌ فێر بوون؟ پاشان ئه‌نجامدانی ۆرك شۆپی جیاواز بۆ مامۆستایانی ئه‌و خوێندنگایانه‌ و كار و پلان بۆ په‌ره‌پێدان و گه‌وره‌كردنی پرۆژه‌كه‌ له‌ داهاتوودا٠
​
جێی ئاماژه‌یه‌ ته‌واوی تێچووه‌ دارایـیه‌كانی ئه‌م پرۆژه‌ په‌روه‌رده‌یـیه‌ له‌سه‌ر ئه‌ستۆی پرۆژه‌ی داكۆكیكردن و یاسا ژینگه‌ییه‌كانی سروشتی عێراقه‌ كه‌ له‌لایه‌ن یه‌كیه‌تی ئه‌وروپاروه‌ پشتگیری دارایی كراوه‌، له‌ هه‌مان كاتدا جێی ده‌ست خۆشی یه‌ به‌ڕێوه‌به‌رایه‌تی گشتی په‌روه‌رده‌ی سلێمانی پشتگیری ته‌واوی خۆیان بۆ ئه‌م پرۆژه‌ په‌روه‌رده‌یی یه‌ دوپات كرده‌وه‌ و به‌ یه‌كه‌مین پرۆژه‌ی په‌روه‌رده‌ی ده‌زانـن كه‌ له‌ سه‌ره‌تاوه‌ به‌و شێوه‌یه‌ ئه‌نجام درابێـت وه‌ پاڵپشتی خۆیان بۆ قۆناغه‌كانی داهاتووی ئه‌م پرۆژه‌یه‌ ده‌ربڕی​٠

له‌ به‌رواری 11ی كانونی دووه‌می 2017، پرۆژه‌ی داكۆكیكردن له‌ سروشتی عێراق به‌شداری كرد له‌ هه‌ڵمه‌تی سه‌وز كردنی پاركی ڕازیانه‌ به‌ ڕووبه‌ری 30 دۆنم كه‌ ده‌كه‌وێته‌ نزیك ڕێگه‌ی سه‌ره‌كی سلێمانی-عه‌ربه‌ت، هه‌ڵمه‌ته‌كه‌ بریتی بوو له‌ چاندنی 1500 نه‌مام له‌ جۆری (سه‌رو،زاوێته‌،سه‌به‌حبه‌ح و به‌ڕوو) كه‌ ڕێكخراوی  زه‌یتون تێچووی پرۆژه‌كه‌ی له‌ ئه‌ستۆ گرتبوو. وه هه‌روه‌هـا ده‌سته‌ی ژینگه‌، ئه‌نجومه‌نی پارێزگای سلێمانی، به‌ڕێوه‌به‌رایه‌تی باخچه‌كان، فه‌رمانگه‌ی ژینگه‌ی سلێمانی و كۆمه‌ڵێك ڕێكخراوی ژینگه‌یی به‌شداری هه‌ڵمه‌ته‌كه‌یان كرد٠    

​گروپی هه‌ولێـر - ڕۆژی یه‌كه‌م و دووه‌م

​گروپی هه‌ولێـر - ڕۆژی سێیه‌م